CLAREMONT
Helpmekaar het oor die afgelope twee jaar ‘n hegte verbintenis met Laerskool Claremont gesmee. Nie net het die legendariese Ruda Landman die Helpies oortuig om ‘n leesprojek by díe skool te begin nie, maar ook het ons hande uitgereik na die Claremont gemeenskap tydens die Helpie Gemeenskapsweek.
Verlede jaar het die Helpies nie-bederfbare voedsel en toiletware vir 10 behoeftige gesinne van die skool ingesamel. Ons het ook 160 graad vier en vyf leerders bederf op ‘n welverdiende uitstappie na die dieretuin. Dit was juis tydens ons besoeke aan die skool dat ons nie kon help om die haglike toestande van die behuising rondom die skool waar te neem nie. (Lees meer op die volgende webwerf : www.joshco.co.za/newsletters_2008/HousTalkQ4_20078.pdf.)
Die kinders van Laerskool Claremont woon grotendeels in woonstelblokke of tuinhuisies waar daar geen voorsiening gemaak is vir speelplek of parkies nie. Die sypaadjies het geen plaveisel of bome nie, en kinders word genoodsaak om maar in die stof rond te speel.
Helpmekaar het Johannesburg City Parks einde Maart 2010 genader om toestemming te verkry om ‘n park in Antoinette straat in Claremont op te rig. Mnr. Fouch Fouche van City Parks, ouer van Nicky wat in 2009 by Helpmekaar gematrikuleer het, het dadelik weggespring en die nodige reëlings met die stadsraad getref. City Parks is só opgewonde oor die projek dat hul reeds vir ons ‘n hele paar skenkings vir bome en gras gereël het.
Dit is dus met trots dat die Helpmekaar Groenprojek aankondig dat ons op Vrydag 26 Oktober 2010 ‘n volledige park in Claremont gaan oprig in ‘n rekordtyd van 12 ure. Hierdie marathon-parkbou sal dan ook die kern van die Helpiefees van 2010 vorm.
Leerders wat belangstel om deel te wees van die Parkbou-komitee het reeds hul name by Me. Susan Keuris opgegee, en daar word reeds baie deeglik beplan om ‘n reuse sukses van hierdie projek te maak.
Ouers wat graag ‘n bydrae van enige aard tot die projek wil lewer, is welkom om Susan Keuris by die skool te skakel (susan.keuris@helpmekaar.co.za). Indien ‘n ouer deel is van ‘n maatskappy wat graag so ‘n groenprojek wil borg, is u ook welkom om ‘n bemarkings-CD aan te vra wat u aan u maatskappy kan voorlê. Skenkings in die vorm van kontant, bome of gras sal waardeer word.
Helpmekaar is trots op ons Helpies se ‘Gaan-Groen-attitude’. Stadig maar seker maak ons ‘n verskil!
